Aukum daglega hreyfingu - Hjólum eða göngum í vinnuna
Hröð tækniþróun hefur stuðlað að mikilvægum framförum á mörgum sviðum en á sama tíma eru vísbendingar um að hún hafi dregið úr daglegri hreyfingu fólks. Má þar nefna að ofþyngd er algengari en áður og bílaeign hefur hraðvaxið en samkvæmt skýrslunni Umhverfisvísar Reykjavíkurborgar 2003 fjölgaði fólksbílum um 33% á hverja 1000 íbúa í Reykjavík á árunum 1996-2003.
Dagleg hreyfing fyrir alla
Rannsóknir staðfesta nauðsyn reglulegrar hreyfingar fyrir heilsuna. Þannig má minnka líkurnar á ýmsum sjúkdómum s.s kransæðasjúkdómum, sykursýki af tegund 2, sumum krabbameinum, stoðkerfisvandamálum, ofþyngd, þunglyndi og streitu. Umfram allt eykur regluleg hreyfing líkurnar á að lifa lengur við betri lífsgæði. Það besta er að hreyfingin þarf alls ekki að vera tímafrek til að hún hafi jákvæð áhrif. Öll hreyfing er betri en engin hreyfing en almennar hreyfiráðleggingar miða við að fullorðnir hreyfi sig rösklega í minnst 30 mínútur daglega og börn og unglingar í minnst 60 mínútur daglega.
Hreyfing til heilsubótar þarf því ekki að vera tímafrek en aukinni hreyfingu fylgir aukinn ávinningur.
Ferðamátinn skiptir máli
Þar sem hreyfing er ekki lengur sjálfkrafa hluti af daglegu lífi fólks er mikilvægt að staldra reglulega við og greina stöðuna. Hreyfi ég mig nóg? Ef ekki, hvað get ég gert til að hreyfa mig meira? Til að svara þessum spurningum er hjálplegt að meta hreyfimynstrið yfir daginn þ.e. hreyfingu í tengslum við vinnu/skóla, hreyfingu í frítíma og síðast en ekki síst hvort ferðamátinn felur í sér hreyfingu.
Með því að ganga eða hjóla til vinnu eða í skólann er á einfaldan hátt hægt að uppfylla lágmarks hreyfiþörf og njóta þess ávinnings sem því fylgir. Stærstu vöðvar líkamans eru virkjaðir, hjartað látið vinna og orkunotkun eykst. Þannig sýndi t.d. dönsk rannsókn að þeir sem hjóluðu að minnsta kosti vikulega í vinnuna voru um 30% ólíklegri til að deyja um aldur fram en þeir sem gerðu það ekki.
Hjólreiðar eru raunhæfur valkostur
Tímaskortur er algeng skýring á hreyfingarleysi. Því skiptir vegalengdin eðlilega máli þegar samgöngumáti er valinn. Samkvæmt ferðavenjukönnun í Reykjavík frá árinu 2002 voru um 76% af öllum ferðum farnar á einkabíl en rúm 19% gangandi eða á hjóli. Þegar litið er á vegalengdir ferðanna kemur hins vegar í ljós að þriðjungur allra ferða var styttri en 1 km og yfir helmingur þeirra var styttri en 2 km.
Veðrátta er annar þáttur sem getur hindrað útiveru. Ef vel er að gáð er veðrið á Íslandi sjaldan það slæmt að klæðnaður við hæfi sé ekki nægileg vörn og síðan er ekkert sem segir að það þurfi að hjóla eða ganga alla daga, stundum er betra en aldrei.
Með smá skipulagi ætti að vera raunhæfur möguleiki fyrir marga að fjölga þeim ferðum sem eru farnar gangandi eða á hjóli. Þannig má slá margar flugur í einu höggi svo sem nýta ferðatímann til heilsuræktar, spara kostnað vegna bílsins, eyða hitaeiningum og stuðla að heilnæmara lofti. Valið er okkar.
- Veljum virkan ferðamáta
- Stundum er betra en aldrei
- Klæðum okkur í samræmi við veður
- Notum hjálm og endurskinsmerki.
- Verum vakandi í umferðinni.
- Hjólað í vinnuna er 2.-22. maí – www.isi.is
Gígja Gunnarsdóttir
verkefnisstjóri hreyfingar, Lýðheilsustöð