Tannþráður - Taktu upp þráðinn
Það er ekki nóg að bursta tennurnar - það þarf líka að nota tannþráð
Samkvæmt nýlegri rannsókn Lýðheilsustöðvar, Heilsa og líðan Íslendinga 2007, eru landsmenn almennnt duglegir að bursta tennurnar en aðeins 12% karla og 24% kvenna, á aldrinum 18-79 ára, nota tannþráðinn daglega. Ef viðhalda á góðri tannheilsu er nauðsynlegt að hreinsa á milli tannanna með tannþræði einu sinni á dag. Börn geta ekki séð um tannhirðuna sjálf fyrr en 10-12 ára og sum þurfa aðstoð með tannþráðinn lengur.
Nýtt fræðslumyndband - Taktu upp þráðinn
Í tilefni af tannverndarviku 2009 var útbúin stutt lifandi fræðsla um tannþráð og notkun hans, undir heitinu Taktu upp þráðinn. Með því að smella á rauðu myndina hér til hliðar er hægt að skoða myndbandið.
Textinn hér á síðunni og myndirnar skýra þetta einnig.
Fræðslan hér á síðunni til útprentunar í A4 stærð (pdf-skjal, opnast í nýjum glugga)
Sambærilegt skjal fyrir leikskóla (.pdf-skjal)
Hvers vegna þarf að nota tannþráð?
Á yfirborð tanna sest skán sem inniheldur bakteríur og matarleifar og getur orsakað tannskemmdir og bólgur í tannholdi ef hún er ekki hreinsuð af með reglulegu millibili, með tannbursta, tannkremi og tannþræði.
Ef blæðir úr tannholdi eru það augljós merki um bólgur í tannholdi og að nauðsynlegt er að hreinsa enn betur.
(Sjá myndband hér neðst).
Tannþráð þarf að nota á barna- og fullorðinstennur því tannburstinn nær ekki að hreinsa nema þrjár (bláar) af fimm hliðum tannanna. Hinar tvær (rauðar) þarf að hreinsa með tannþræði daglega.
Hvernig tannþráð á að nota?
Þann tannþráð sem hverjum og einum líkar best við. Vaxborinn tannþráður smýgur vel á milli tanna þar sem tannbilin eru þröng. Þráður sem inniheldur flúor styrkir glerung tanna. Bragðefni í tannþræði gefa ferskara bragð í munninn. Til eru ýmsar gerðir handfanga fyrir tannþráð, bæði einnota og fjölnota, sem geta auðveldað hreinsunina.
Svona er tannþráður notaður:
Æfingin skapar meistarann - Gott ráð er að byrja alltaf á tannþræðinum og bursta svo.
Þræðinum er vafið um vinstri og hægri vísifingur. Notið þumla og löngutöng til að halda þræðinum og hafið þráðinn stuttan milli fingranna.
Strekktur þráðurinn er færður upp og niður eftir tönninni, fyrst öðru megin tannbilsins síðan síðan hinu megin. Þræðinum er stýrt varlega milli tannanna alveg niður í glufuna milli tannar og tannholds. Þráðurinn þarf að nuddast þétt við tennurnar allan tímann. Það sama gildir um tannþráð í haldara.
Svona eru öll tannbilin hreinsuð bæði í neðri og efri gómi. Góð venja er að byrja alltaf á sama stað og finna bestu leiðina svo ekkert tannbil gleymist. Notið tannþráðinn fyrst – bustið svo.
Frekari fróðleikur
Tannskemmdir
Rótarskemmdir
Bólga í tannholdi - myndband sem sýnir orsakir og afleiðingar bólgu í tannholdi
Millitannbursti
Jaxlinn - teiknimynd um tannþráð
--------------
Hluti myndanna hér á síðunni eru birtar með leyfi danska tannlæknfélagsins (DTF í Danmörku)og tannheilsugæslunnar í Greve, Danmörku.
