Hollráð um heilsuna

Hollráð um heilsuna er samstarf Lýðheilsustöðvar, Landlæknisembættisins og Morgunblaðsins. Í Daglegu lífi í Morgunblaðinu birtist vikulega pistill með þessu heiti og er efnið til skiptis frá stofnununum tveimur. Við upphaf samstarfsins, 4. september 2004, skrifuðu Anna Elísabet Ólafsdóttir, þáverandi forstjóri Lýðheilsustöðvar, og Sigurður Guðmundsson, þáverandi landlæknir, pistil saman þar sem m.a. þetta kemur fram: „Báðar þessar stofnanir starfa með það að markmiði að efla og viðhalda heilsu landsmanna, hvor á sinn hátt. Starfsmenn stofnananna munu sjá um pistlana en einnig kalla til sérfræðinga eftir þörfum. Lesendur geta þannig treyst því að það sem þar er sagt byggist á nýjustu og áreiðanlegustu þekkingu sem völ er á hverju sinni. Jafnframt verður lögð áhersla á að gefa lesendum góð og hagnýt ráð.“