Hreyfing

Allir þurfa að hreyfa sig á hverjum degi, og ungt fólk í minnst 60 mínútur daglega. Hreyfingin ætti að vera bæði miðlungserfið og erfið (sjá aðeins neðar á síðunni). Heildartímanum má skipta í nokkur styttri tímabil yfir daginn, t.d. 10-15 mínútur í senn. Hreyfingin ætti að vera eins fjölbreytt og mögulegt er til að efla sem flesta þætti líkamshreysti. Kröftug hreyfing, sem reynir á beinin, er mikilvæg fyrir beinmyndun og beinþéttni.

Hreyfing er almennt skilgreind sem hvers konar vinna beinagrindarvöðva sem eykur orkunotkun umfram það sem gerist í hvíld. Hún nær því yfir nánast allar athafnir sem fela í sér hreyfingu með einum eða öðrum hætti, t.d. að ferðast á milli staða gangandi eða á hjóli, heimilisstörf, garðvinnu, ýmiss konar leiki, íþróttir og aðra skipulagða þjálfun.

Miðlungserfið hreyfing er hreyfing sem krefst þrisvar til sex sinnum meiri orkunotkunar en hvíld.
Erfið hreyfing er hreyfing sem krefst meira en sex sinnum meiri orkunotkunar en hvíld.

Dæmi um miðlungserfiða og erfiða hreyfingu (.jpg-mynd, opnast í nýjum glugga)

Mikilvægt er að hafa hugfast að mismunandi líkamsástand fólks þýðir að það sem reynist einum miðlungserfið hreyfing getur reynst öðrum erfið hreyfing.

Hreyfing styrkir ónæmiskerfið og minnkar líkurnar á flestum langvinnum sjúkdómum. Ávinningurinn af því að hreyfa sig er því ekki bara að fyrirbyggja sjúkdóma eða halda þeim í skefjum heldur líka að auka vellíðan og lífsgæði almennt.

Enginn ætti hinsvegar að eyða meira en 2 klst. á dag í tölvuleiki eða aðra afþreyingu sem fram fer á skjá, svo sem að vafra á netinu eða horfa á sjónvarp.

Auðveldasta leiðin til að auka hreyfingu er að flétta hana sem mest saman við daglegt líf.

Dæmi um daglega hreyfingu:

• Ganga eða hjóla daglega í og úr skóla / vinnu.
• Virk þátttaka í íþróttatímum, ganga um í frímínútum.
• Nýta öll tækifæri sem gefast til hreyfingar, s.s. að nota stiga í stað þess að taka lyftu.
• 2-3 skipulagðar æfingar í viku, s.s. ganga, hlaup, sund og nýta sér aðstöðu og þjónustu skóla, íþróttafélaga, heilsuræktarstöðva og ferðafélaga.

Um helgar: Gera eitthvað með fjölskyldu og vinum sem felur í sér hreyfingu, s.s. gönguferðir, fjallganga, hjólreiðar og sund.

Ferðamátinn skiptir máli.

Með því að ganga eða hjóla í og úr vinnu, í skóla, tómstundastarf og til að sinna öðrum erindum er hægt að uppfylla þarfir um lágmarkshreyfingu á einfaldan hátt. Auk þess að nýta ferðatímann til ókeypis heilsuræktar er hægt að spara kostnað vegna einkabílsins. Svo er hægt að ganga eða hjóla aðra leiðina og taka strætó til baka. Þá sleppurðu líka við að skafa af bílnum eða hringsóla í korter í leit að bílastæði. Flestir strætisvagnar geta tekið hjól með, þó ekki á álagstímum.

Frábær leið til heilsuræktar er að ganga eða hjóla í skólann en svo er líka gott að nota frímínútur og önnur hlé til að teygja úr sér og ganga rösklega um. Þannig er hægt að losa um andlega spennu, bæta einbeitingu og minnka líkur á stirðum og aumum vöðvum & liðum.

Vigtin er takmarkaður mælikvarði á heilbrigði.

Fólk sem flokkast of þungt en stundar hreyfingu reglulega, getur verið heilbrigðara en grannvaxið fólk sem hreyfir sig lítið. Því er mikilvægt að leggja áherslu á lífsvenjur fremur en á líkamsþyngd.

Stundum betra en aldrei

Mörgum finnst nauðsynlegt að hafa bíl til að ferðast í og úr skóla/vinnu, en þá er um að gera að nýta aðrar ferðir til hreyfingar. Með því að skipuleggja sig er raunhæft hjá fjölmörgum að fara fleiri ferðir gangandi eða á hjóli heldur en núna er.

Hreyfihringurinn (PDF-skjal, opnast í nýjum glugga)

Orkusetur.is - hjóla- og göngureiknir - Hér er hægt að sjá hversu mikið er hægt að spara af eldsneyti og útblæstri ef bifreiðin er skilin eftir heima. Einnig má sjá áætlaðan kaloríubruna ferðarinnar enda er verið að brenna líkamsfitu í stað hefðbundins eldsneytis.